Дүниежүзінде қанша мұсылман бар?
Әлемде мұсылмандардың қатары көбейіп келе жатыр деп естиміз.
Бүгінде өзін Мұхаммед пайғамбардың үмбеті санайтын жамағаттың саны қанша?
Мейрамбек ҚОЖАГЕЛДІ, Алматы қаласы
АҚШ-тағы PEW зерттеу орталығының мәліметінше, дүниежүзіндегі мұсылмандардың жалпы саны 1,57 млрд-қа жетіп отыр. Демек, әлемнің әрбір төртінші тұрғыны исламды ұстанады. Мұсылман әлеміне қатысты әлеуметтік санаққа үш жыл уақыт жұмсалған. Нәтижесінде исламды қабылдағандар қатарының жыл санап артып келе жатқаны белгілі болды. Зерттеу жұмысы иісі мұсылманның, негізінен, 60 пайызының – Азия құрлығында, 20 пайызының Таяу Шығыс пен Солтүстік Африкада тұратынын көрсетіп отыр. Сондай-ақ Батыс Еуропада мұсылман дінін ұстанушылардың саны күллі құрлық халқының бес пайызын қамтитыны анықталды. Айта кетейік, қазір әлемде дәстүрлі төрт діннің ішінде христиандықты ұстанушылар көп. Олардың қатары 2 млрд-тан асады.
