Экологиялық апатты аймақта тұрғандарға қандай көмек көрсетіледі?

Мен Қызылорда облысы Арал ауданында дүниеге келіп, сонда орта білім алдым. Қазалы ауданына тұрмысқа шығып, сонда тұрып жатырмын. 2000 жылдан бастап жолсерік болып жұмыс атқарудамын. Осы эколо­гия­лық апатты аймақта тұруыма байланысты қосымша ақы алуым керек пе?
Ажар ІЗТІЛЕУҚЫЗЫ, Қызылорда облысы
1992 жылғы 30 маусымдағы ҚР «Арал өңіріндегі экологиялық қасірет салдарынан зардап шеккен азамат­тарды әлеуметтік қорғау туралы» Заңының 13-бабына сәйкес эколо­гиялық қасірет аймағында тұратын халыққа эколо­гиялық жағынан қолай­сыз жағдайда тұрғаны үшін: эколо­гиялық апат аймағы бойынша –  1,5; экологиялық дағдарыс аймағы бойын­ша  – 1,3; экологиялық дағдарыс  жағ­дайына  жақындаған аймақ  бойынша  – 1,2 коэффициентті қолдана отырып, еңбекке ақы, сти­пендия төлеу бел­гіленеді. Осы коэф­фи­циенттер қыз­меткердің лауазым­дық жалақысына қолданылады. Заңның 3,4,5-баптарына сәйкес экологиялық апат аймағына Қызылорда облысының Арал және Қазалы аудандарының, Ақтөбе об­лысының Шалқар ауданының ау­мақ­тары кiредi; экологиялық дағ­дарыс аймағына Қызылорда облысы аудан­дарының аумақтары, Қызылорда қаласы және әкiмшiлiк-аумақтық бағы­нысына кiретiн елдi мекендердi қоса алғанда, Байқоңыр қаласы кiредi; экологиялық дағдарыс жағдайына жақындаған аймаққа Ақтөбе облы­сының Байғанин, Ырғыз, Мұғалжар, Темiр аудандарының Оңтүстiк Қазақ­стан облысының Арыс, Отырар, Созақ, Шардара аудандарының және Түркiс­тан қаласының, сондай-ақ Қарағанды облысының Ұлытау ауда­нының аумақ­тары кiредi.