Катынь қырғыны туралы не білеміз?
Жуырда Ресей Катынь оқиғасын мойнына алды. Осы геноцид кімдерге бағытталған, жалпы, осы жазалау оқиғасы туралы айтып бересіздер ме?
Асылжан ЕРБОЛАТҰЛЫ
Катынь жазалау оқиғасы – КСРО-ның қолымен поляк азаматтарының жаппай жазалануы. Поляктар бұл қанды оқиғаны «Катынь қылмысы» деп те атайды. 1940 жылдың көктемінде НКВД қызметкерлері Катынь орманының түбінде тұтқындағы 21 857 полякты ату жазасына кесіп, сол жерге ортақ ор қазып, оларды көміп тастайды. Бұл оқиға поляк интеллигенциясы үшін өте ауыр тиді. Себебі оққа ұшқандардың құрамы адвокаттар, журналистер, инженерлер, мұғалім, дәрігерлер секілді білікті мамандардан, бірен-саран профессорлардан тұратын.
Олардың мәйітін алғаш болып Гитлер жауынгерлері әшкерелейді. Өз кезінде Кеңес өкіметі бұл мәліметтен бас тартты және КСРО әкімшілігі НКВД-ның жауапкершілігін ресми түрде мойнына алған 1990 жылға дейін бұл қанды оқиғаны фашистік Германиядан көріп келді. Айта кетерлігі, оқиға орын алған жылы Гитлер тапсырмасы бойынша да жүздеген поляк өлім құшқан болатын. Осыны дәйек ретінде ұстаған орыс тарихшылары Катынь оқиғасын қазірдің өзінде КСРО-ның көзқарасымен беріп жүр. Ресей премьер-министрі Владимир Путин қыркүйек айының басындағы Польшаға жасаған сапарында осы пікірталасқа нүкте қойып, қатыгез Катынь оқиғасы КСРО-ның қолымен жасалғанын мойнына алды.
