Мектеп медбикесінің еңбек демалысы қанша күн?

Мен мектепте медициналық қызметкер болып жұмыс істеймін. Таяуда еңбек демалысына шықтым. Бірақ мектеп директоры маған «бір айдан соң жұмысқа шығасың» деді. Осы дұрыс па? Медициналық қызметкердің еңбек демалысы қанша күн болуы тиіс?
Феруза ЫСҚАҚОВА, Оңтүстік Қазақстан облысы
Еңбекті нормалау және еңбекке ақы төлеу басқармасының сарапшы маманының мә­ліметінше, ҚР Еңбек кодексінің (бұдан әрі – кодекс) 239-бабына сәйкес, мемлекеттiк бюджет есебiнен ұсталатын азаматтық қыз­мет­шiлерге лауазымдық жалақысы мөл­ше­рiн­де сауықтыруға арналған жәрдемақы төле­не отырып, ұзақтығы күнтiзбелiк 30 күн­нен кем болмайтын жыл сайынғы ақылы еңбек демалысы берiледi. Азаматтық қыз­мет­шiлерге сауықтыруға арналған жәр­дем­ақы күнтiзбелiк жылда бiр рет төленедi.
Кодекстің 102-бабына сәйкес, ауыр жұ­мыс­­тарда, еңбек жағдайлары зиянды (ерек­ше зиянды) және қауiптi жұмыстарда iстейтiн қызметкерлерге ұзақтығы кемiнде күнтiзбелiк алты күн болатын жыл сайынғы ақылы қо­сым­ша еңбек демалыстары берi­ле­дi.
Яғни қосымша демалыс лауазымдары мен кәсіптері Қазақстан Республикасы еңбек және халықты әлеуметтік қорғау министрі мін­детін атқарушының 2007 жылғы 31 шілдедегі №182-ө бұйрығымен бекітілген Жұ­мыс уақытының қысқартылған ұзақ­ты­ғына, еңбекақының жоғары мөлшеріне және жыл сайынғы ақылы қосымша еңбек де­ма­лы­сына құқық беретін өндірістердің, цех­тар­дың, кәсіптер мен лауазымдардың тізімі, ауыр жұмыстардың, еңбек жағдайлары зиянды (ерек­ше зиянды) және қауіпті жұмыстардың тізбесіне енгізілген қызметкерлерге беріледі.
Аталған тізімде денсаулық сақтау, бiлiм беру, әлеуметтiк қамсыздандыру ұйым­да­ры­ның және демалыс үйлерінің дәрiгерi, орта, кiшi медициналық қызметшiлерiнің лауа­зым­да­ры аталған, оларға қосымша 12 күн ақылы қосым­ша еңбек демалысы беріледі.
Осыған орай, сізге 42 күндік еңбек дема­лы­сы берілуі тиіс.