Піскен қарбызды қалай таңдаймыз?
Қазір сауда нүктелерінің бәрін де тәтті, дәмді, пайдалы қарбыздар сатылуда. Оны қалай дұрыс таңдауға болады? Осы сұрақтың жауабын KYN.KZ тілшісі төменде толығымен жазып, назарларыңызға ұсынды, - деп хабарлайды Alashainasy.kz тілшісі.
1. Тым кішкентай немесе ебедейсіз үлкен қарбыз алмаңыз. Ең дұрысы – салмағы 5 килодан артатын қарбыз. Ұсақ қарбыз көлеңкеде өскен, азықтық заттары мөлшерден аз сіңірген, ал үлкен қарбыз «нитратты» көп жеген болуы мүмкін.
2. Қарбыздың қабығының түсі ашық болғаны жақсы. Яғни жарық пен жылуды, азықтық заттарды жеткілікті мөлшерде алған қарбыздың қабығындағы қара-көк, жасыл-ала түстер өз сызығымен айқын көрініп тұрады.
3. Қарбызды қысып көріп таңдайтын әдет бар. Бірақ бұл үзілгеніне ұзақ болмаған, көп тасымалданбаған қарбызға қатысты. Ал үзілгеніне көп болған, ұзақ тасымалданған қарбыз қысып көргенде шыртылдаған дыбыс шығармайды, өйткені оның еті біршама босаған. Сондықтан қарбызды сол қолға ұстап тұрып оны бүйірінен шапалақпен жоғарыдан төмен, төменнен жоғары қарай ұрып көру керек. Сонда ол оң қолдың соққысын сол қолға толық сезіндіреді. Бұл оның жақсы піскенінің белгісі.
4. Қарбызды жерде жатқан жері сары емес, күңгірт қызғылт сары түсте болғаны жақсы. Бұл да оның сапалы піскенін білдіреді.
5. Қарбыздың «құйрығы» емес, осы «құйрықтың» қарбызға жалғасқан тұсы «құрғақ кіндік» түрінде болғаны жақсы. Яғни өз күшімен, дұрыс піскен қарбыз сабағынан өз күшімен бөлінеді, құйрығы қурайды.
6. Сапалы піскен қарбыз қабығын тырнақпен жыруға болмайды. Өйткені ол қатты, толық пісіп, сабағынан өз күшімен ажыраған қарбызды күн қызуынан, буланудан сақтайды. Ал егер саусақпен сырып көргенде қабық жырылып-тесілсе, онда қарбыздың толық піспегені.
7. Қарбызды бір тұсынан саусақ ысығанша ысқылап, иіскеп көрсе де болады. Егер осы кезде жаңа шабылған шөп иісі шықса, онда ол қарбыздың піспегенінің белгісі.
8. Ашыған немесе ашиын деген қарбызды алуға болмайды. Ал ондай қарбыздар жұмсақ, былқылдақ болады. Алақанмен ұрып көргенде адам су толы пакетті ұрғандай болады. Бұл – сырты бүлінбеген болса да, еті езілген қарбыз.
9. Қарбыз ірі әрі жеңіл болса, ол оның жақсы піскенінің белгісі. Яғни шикі қарбыз сырт көрінісіне қарағанда салмақты болады. Өйткені қарбыз жетілген сайын оның өзіндік салмағы ортая береді.
