Туылмаған балаға да заң бар
Кейбір елдерде туылмаған балаға қатысты заң бар деп естідім. Ол не үшін қажет? Біздің елімізде ондай заң бар ма?
Марал АЛМАБЕКОВА, Алматы
Кейбір Еуропа елдерінде туылмаған нәрестені қорғау туралы заң бар екені рас. Яғни әлі жарық дүние есігін аша қоймаған сәбилердің де құқықтары қорғалады. Ал біздің елімізде ондай арнайы заң жоқ. Дегенмен туылмаған бала мәселесіне қатысты түйткілді мәселелер баршылық. Мәселен, елімізде түсік жасатып, бала алдыртуға рұқсат етілген. Ал әлгіндей заңы бар мемлекеттерде бұған қатаң тыйым салынған көрінеді. Сондай-ақ әлі туылмаған шарананы қорғауға қатысты тыйымдардың бірі ретінде құрсақта жатқан баланың жынысын анықтауға да тыйым салынатынын айтуға болады. Мәселен, Қытай елінде іштегі шарананың жынысын анықтауға қатаң тыйым салынған. Себебі мамандардың зерттеуі барысында бұл елде әйелдерге қарағанда, еркектердің көбейіп кеткені анықталған. Осыған орай, ата-аналар тарапынан бала жынысына таңдау тууына байланысты дәрігерлерге алдын ала бала жынысын анықтауға тыйым салынған.
