Work and Travel бағдарламасына қалай қатысуға болады?

Қызым американдық Work and Travel бағдарламасына қатысып, Америкаға барғысы келеді. Бұл бағдарламаның мақсаты қандай және бағдарламаға қатысқысы келетін жастарға қандай талап қойылады?
Мейрамгүл ӘЛИАСҚАРОВА, Алматы
Сіздің сауалыңыз бойынша АҚШ Бас консулдығы пресс атташесінің көмекшісі Рахия Бекбаева жауап береді. Қазақшала­ғанда «жұмыс және саяхат» дегенді білдіретін АҚШ Мемлекеттік департаментінің қолдауы­мен құрылған аталмыш бағдарлама бойынша елімізден жыл сайын жүздеген студент мұхит асады. Олардың жат елде саяхаттап қана қоймай, ақша да табуына жағдай жасалған. Бағдарламаға, негізінен, ағылшын тілін жақсы білетін студенттер қатыса алады. Бағдарлама ұзақтығы үш ай. Оның бір айын­да сол елді аралап, саяхаттауға мүмкіндік жасалған. Қазақстанда 30 шақты агенттік студенттерге осы бағдарлама аясында жұмыс істеп, ақша табуға әрі шетелді саяхаттауға мүмкіндік жасап отыр. Бағдарламаға қатыс­қысы келетін студенттер қажетті құжаттарын жинап, АҚШ елшілігіне тапсыруы қажет. Айта кетер жайт – колледж студенттері, тілдік курстардың, кешкі оқу бөлімінің және ЖОО-да сырттай оқитын студенттер бұл бағдар­ламаға қатыса алмайды.