Құрбандық шалмай-ақ, садақа берсек бола ма?
Құрбан айт мерекесінде құрбандық шалмай-ақ, садақа бере салсақ бола ма?
Батырхан, Қызылжар қаласы
Бұл сұраққа кезінде «Нұр Астана» мешітіне бас имам болған белгілі исламтанушы Қалижан қажы Заңқоев жауап береді:
–Пайғамбарымыз (с.ғ.с.): "Кімде-кімнің шамасы келе отырып, құрбандық шалмайтын болса, біздің намаз оқитын жерімізге келмесін! ", - деген. Бұл – өте ауыр айтылған сөз. Сондықтан жағдайы бар адам бір қой, я болмаса, жеті адам бірігіп, сиыр немесе түйені құрбандыққа шалуы тиіс. Құрбан айттың бірінші күні шала алмаса, одан кейінгі екі күннің ішінде сол мұсылмандық міндетін орындап шығуы шарт. Ал үлгермей жатса, құрбандыққа шалатын малдың ақшасын садақа ретінде берсе де болады. Алайда Құрбан айт болғаннан кейін құрбандық шалған жөн. Оның еті, қаны мен жүні Алла тағалаға жетпейді. Аллаға біздің жүрегіміздегі тақуалығымыз, шын ниетіміз жетеді. Құранда "Хаж" сүресі-нің 28-аятында: "Құрбанның етінен өздерің жеңдер, әрі міскіндер мен кедейлерге жегізіңдер", – делінген. Демек, құрбандыққа шалынған малдың етінен өзі және өзгелер де жей алады. Дұрысы, құрбан етін үшке бөліп, бір бөлігін мұқтаж жандарға, екінші бөлігін туған-туыстарға немесе көршілерге, ал қалған бөлігін өз отбасына алып қалған жөн. Сондай-ақ "барлығын Алла жолында атадым" деп құрбан етін түгелдей тұрмысы төмен жандарға таратып беруге де болады.