Қазақстанда қыздарды секс құлдыққа сатумен айналысқан Ресей азаматы ұсталды
Ресей азаматын Өзбекстан азаматшасын жыныстық құлдықта ұстады деген күдікпен уақытша ұстау изоляторына екі айға қамады деп хабарлайды ratel.kz.
«Күдіктіге қатысты екі айға қамауға алу туралы шешім шықты» дейді Қазыбек аудандық №1 Қарағанды сотының баспасөз қызметі. Ресейлік ҚР қылмыстық кодексінің 128 бабы бойынша, яғни «Адам саудасы» және ҚК 149 бабы «Тұрғын үйге қолсұғылмаушылықты бұзу» бойынша айыпталып отыр. Іс материалында өзбекстандық қыздың Қазақстанға ақша табу мақсатында келіп, жыныстық құлдыққа тап болғаны жазылған. Оның барлық құжаттарын тартып алып, Алматыдағы жалдамалы пәтерде ұстаған. Қыздың тағдырын 28 жасар Ресей азаматы шешіп отырды. Алматыда ол бірнеше ай бойы жезөкше болып жұмыс істеген. Одан кейін Ресей азаматы оны қарағандылық жеңгетайларға сатып жіберген екен. Соммасы айтылмады. Өзбекстан азаматшасын Қарағанды облыстық ішкі істер департаментінің полицейлері босатты. ІІД баспасөз қызметінің мәліметінше, ұйымдасқан қылмыспен күрес басқарамасының қызметкерлері тұтқын әйелді жыныстық құлдықтан босатып, РФ азаматын ұстады. Одан бөлек жеңгетайлық және адам саудалады деген күдікпен 37 жасар Қарағанды тұрғыны мен 30 жасар Шахтинск қаласының тумасы ұсталды.
