Серік Күдебаевқа қатысты сот үкімі шықты
Талдықорғанда Алматы облыстық полиция департаментінің бұрынғы басшысы Серік Күдебаевқа қатысты сот үкімі шықты, деп хабарлайды Azattyq Ruhy.
Сот үкімімен Серік Күдебаев 10 жылға бас бостандығынан айырылды.
Үкімді Талдықорған қалалық сотының төрағасы Абдилла Умбетай оқыды.
«Сот Серік Күдебаевты Қылмыстық кодекстің 362-бабының 4-бөлігі («Билік немесе лауазымдық өкілеттікті асыра пайдалану»), 146-бабының 2-бөлігінің 1-тармағы («Азаптау») бойынша қылмыстық құқық бұзушылық жасағаны үшін кінәлі деп таныды. Қазақстан Республикасы Қылмыстық құқық бұзушылықтардың жиынтығы бойынша жазаны ішінара қосу арқылы Күдебаевқа құқық қорғау органдарында және мемлекеттік қызметте, жергілікті өзін-өзі басқару органдарында лауазымды қызметтерді атқару құқығынан 10 жылға айыра отырып, түпкілікті 10 жылға бас бостандығынан айыру жазасы тағайындалды», - делінген сот шешімінде.
Алматы облысының ПД бұрынғы басшысы жазасын орташа қауіпсіздіктегі түзеу мекемесінде өтейтін болды.
«Күдебаевты полиция генерал-майоры арнаулы атағынан және II дәрежелі «Даңқ» және «Айбын» мемлекеттік наградаларынан айыру туралы Президентке ұсыныс енгізілсін», - делінген сот шешімінде.
Оған қатысты қамауға алу туралы бұлтартпау шарасы өзгеріссіз қалды.
Тақырыпқа орай: Серік Күдебаев сотта соңғы сөзін сөйледі
Айта кетерлігі, Серік Күдебаевқа билік пен лауазымдық өкілеттігін асыра пайдалану және азаптау баптары бойынша айып тағылды. Алайда сотталушы тағылған айыппен келіспей, кінәсіз екенін мәлімдеген болатын.
Еске салайық, өткен жылдың 26 қаңтарында Алматы облыстық полиция департаментінің бастығы Серік Күдебаев қызметінен босатылған болатын. Оның жұмыстан босатылуының жай-жапсары Ішкі істер министрлігінде белгілі болды.
Серік Күдебаевтың соты Талдықорғанда үстіміздегі жылдың қаңтар айының басында басталды. Ол 2022 жылғы қаңтар оқиғасы кезінде «ауыр зардаптарға әкеп соқтырған қызметтегі әрекетсіздігі» үшін айыпталған еді.
Сот талқылауы барысында прокурор айыпталушыны 9 жылға бас бостандығынан айыруды сұрады.
Бастапқыда генерал-майорға үкім 10 наурызға белгіленген, бірақ сотталушының сырқатына байланысты сот отырысы кейінге шегерілді. Содан 16 наурызда дәл осындай себеппен сот отырысы өтпей қалды. Үкімді жариялау 20 наурызға шегерілді, бірақ сол күні кейінге шегерілді. Содан кейін сот отырысы 27 наурызда төртінші рет кейінге шегерілді. 30 наурызда Серік Күдебаевтың сотқа күштеп жеткізілетіні белгілі болды. Кейін оның елден қашып кеткені белгілі болды. Анықталғандай, генерал Бішкектегі «Манас» әуежайынан Ыстамбұлға ұшқан.
30 наурызда Серік Күдебаевтың сотқа күштеп жеткізілетіні белгілі болды. Кейін оның елден қашып кеткені жарияланды.
27 сәуірде Серік Күдебаевтың ұсталғаны белгілі болды. ҚР Бас прокуроры Берік Асылов оның Түркиядан жеткізілгенін мәлімдеді. Генерал уақытша ұстау изоляторына қамалды.
Ал оның ұлы Арман Мырзақұлов әкесінің ұсталғанына қатысты пікір білдіріп, генерал-майордың құқық қорғау қызметкерлеріне өз еркімен берілген айтты.
Алайда Бас прокуратура Алматы облыстық полиция департаментінің бұрынғы басшысы Серік Күдебаевтың Қазақстанға өз еркімен келмегенін мәлімдеді.
