Тапаншамен қорқытып, байлап тастаған: Теміртауда адам өліміне қатысы бар қылмыстық топ анықталды
Қарағандыда полиция қарақшылық пен кісі өлтірді деген күдіктілерді құрықтады, деп хабарлайды Stan.kz ақпарат агенттігі Polisia.kz сайтына сілтеме жасап.
20 қарашада 32 жастағы қала тұрғыны Қарағанды облысы, Теміртау қаласы полиция бөлімінің кезекші бөліміне арыз берді. Ол Момышұлы көшесіндегі үйдің ауласында белгісіз екі ер адам тапаншамен қорқытып, оның пәтеріне кіргенін айтты. Содан кейін, байлап, оған және 50 жастағы әйелге дене жарақатын тигізді, ол алған жарақаттарынан сол жерде қайтыс болды. Қылмыскерлер жәбірленушілердің ақшасы мен мүлкін иемденіп алған.
Бұл факт бойынша ҚР Қылмыстық кодексінің 99-бабы 2-бөлігі "Адам өлтіру" және ҚР ҚК-нің 192-бабы 3-бөлігі "Қарақшылық" бабы қозғалды.
Кешенді жедел-тергеу шаралары барысында полиция қызметкерлері төрт күдіктіні анықтады.
"26 және 28 қарашада арнайы операцияның нәтижесінде Нұр-Сұлтан мен Жезқазғандағы криминалдық полиция қызметкерлері төрт күдіктіні ұстады. Олар Жезқазған, Сәтбаев және Нұр-Сұлтанның 25, 29, 34 және 39 жастағы тұрғындары болып шықты. Полиция күдіктілерден түрлі маркалы қару-жарақ пен патрондарды тәркіледі. Қазіргі уақытта ұсталғандар уақытша ұстау изоляторына қамалды. Тергеу амалдары жүргізілуде. Шабуыл жасаушылардың басқа да осыған ұқсас қылмыстарға қатыстылығы тексеріліп жатыр", - деді Қарағанды облысы ДП бастығының орынбасары Әбіл Әбілдин.
