«Болашақ» стипендиясы иегерлерінің тізімі жарияланды
«Болашақ» стипендиясы иегерлерінің тізімі жарияланды. Бұл туралы ғылым және жоғары білім министрлігінің бапасөз қызметі хабарлады.
Мемлекеттік кеңесші Ерлан Қариннің төрағалығымен өткен шетелде кадрлар даярлау жөніндегі республикалық комиссия шешімімен әлемдегі жетекші университеттер мен салалық ұйымдарда тағылымдамадан өтетін 25 қазақстандық «Болашақ» стипендиясының иегері болды.
«Болашақ» халықаралық стипендиясы иегерлерінің тізімі Халықаралық бағдарламалар орталығының сайтында жарияланған.
«Болашақ» халықаралық стипендиясын тағайындау конкурсына қатысу үшін құжаттарды қабылдау төрт лекке бөлінді.
Құжаттарды қабылдаудың алғашқы мерзімі — 2023 жылғы 9 қаңтар мен 27 қаңтар аралығында. Қабылдаудың екінші легі 3 сәуір мен 28 сәуір аралығында, үшіншісі — 5 маусым мен 7 шілде аралығында, төртіншісі — 17 шілде мен 15 қыркүйек аралығында өтеді.
Жалпы алғанда, биыл магистратура және резидентура бағдарламаларына 395 стипендия, докторантураға 50 стипендия, тағылымдамадан өту үшін 110 стипендия бөлінді.
