Минскте сайлаудағы ТМД бақылаушылары миссиясының жұмысы талқыланады
28 ақпанда Беларусь астанасында Тәуелсіз мемлекеттер достастығына мүше мемлекеттердің достастықтың жарғылық және басқа да органдары жанындағы тұрақты уәкілетті өкілдері кеңесінің отырысы өтеді, деп хабарлады ТМД Атқару комитетіндегілер.
Достастықтың бас хатшысы Сергей Лебедевтің төрағалығымен өтетін отырыста 2021-2022 жылдардағы Тәуелсіз мемлекеттер достастығына мүше мемлекеттердегі президент және парламент сайлауын, сондай-ақ референдум өткізудегі ТМД бақылаушылары миссиясының қызметін талқылау жоспарланып отыр.
2022 жылы Қазақстанда ел Конституциясына өзгерістер мен толықтырулар енгізу бойынша жалпыхалықтық референдум, сондай-ақ президент сайлауы өтті.
ТМД тұрақты өкілдері қарастыратын басқа мәселелердің қатарында 7 маусымда Сочиде өтетін ТМД үкімет басшылары кеңесі отырысының күн тәртібі бойынша ұсыныстар да бар.
