Ата-енемен тұрудан қашпау керек: Елімізге үлгілі жұптар бақытты отбасының "формуласын" айтты

Қазақ өнерінде жұбы жарасқан жанұялар жетерлік. Олардың сезімге толы махаббат хикаялары да сан түрлі. Осы орайда Stan.kz ақпараттық агенттігінің тілшісі жұлдызды жұптар арасында арнайы сауалнама жүргізіп, бақытты болудың формуласы мен құпиясына үңіліп көрген еді.

Мәселен, отандық шоу-бизнесте ерекше үнімен өз аудирториясын қалыптастырған жұп – Жанболат пен Жазира. Осыдан 22 жыл бұрын шаңырақ көтерген ғашықтардың қазіргі таңда Қазыбек есімді 20 жастағы ұлы бар. Бақытты отбасының жастарға айтар кеңесі мынадай...    

«Бақытты болудың ешқандай құпиясы жоқ. Адамның өзінің жан-дүниесі нені қалайды, сол қалауымен өмір сүрсе адам бақытты болады. Ол сырттай танымалдылығына қарап, көп балалы екеніне қарап, күйеуінің барына, жоғына қарап, ақшасына қарап бақытты, бақытты емес деп айта алмаймыз. Сырттан әдемі киініп, әдемі көрінгенімен, оның жан-дүниесі бақытты ма, бақытсыз ба біз білмейміз. Сондықтан, бақытты болу үшін – ең бастысы біреудің өміріне қызықпау керек. Адам өзінің жан-дүниесіне үңілу керек. Отбасын құрғаннан кейін жауапкершілік үлкен болу керек. Бір-бірін сүйіп қосылғаннан кейін байлыққа қызығып кетпеу керек. «Байлыққа қызығып, өзгенің отбасы жақсы өмір сүріп жатыр, біздікі нашар» - деп бөлмеу керек. Өмірдің ащысы мен тұщысын бірге бөлісіп, жақсы көзқараспен қарап, сыйластықпен, кешіріммен бала-шағаны тәрбиелеу керек. Дәл осы ұстаныммен жақсы өмірге қадам басқан дұрыс», - дейді Жанболат пен Жазира.

     Бұл сауалнамаға Димаш Құдайбергеннің де ата-анасы қатысты. Қанат пен Света Айтбаевтар екі ұл мен бір қызды өмірге әкелген. Тұңғышы әлем таныған әйгілі әншіле айналды. Димаштың соңынан ерген қарындасы мен інісі де өнерден құр алақан емес. Өнегелі отбасының өркендеуіне ата-әжесінің септігі көп тиген көрінеді.   

«Ұл мен келін ата-ененің тәрбиесінен қашпау керек. «Ата-анасынан бөлек кетіп, мен бұлармен тұра алмаймын, бөлек тұрсам бәрі керемет болады» - деп беталды қол үзіп кетіп жатқан жастар көп. «Атаңа не істесең, алдыңа сол келеді» - деп қазақта айтқан ғой.  Соның барлығы алдынан шығады. Баласына алаңсыз болып, жұмыс жасап, баласының тәрбиесіне дұрыс бір бағыт берсін десе, онда ата-әжесінің тәрбиесінен ажырамау керек. Ең алдымен отбасын құрған екі адамның арасында өзара түсіністік, бір бағытқа қарау керек. Екеуі екі жаққа тартпау керек. Екі ортадағы алауыздық ешқашан жақсылық әкелмейді. Сол отбасының ертеңіне, ғұмырының ұзақтығына деген үлкен сенімділік керек. Отбасы үшін одан кейінгі керегі – еңбекқорлық. Еңбектен қашып, алдыға ұмтылмай, қолды бір сілтеп жалқауланып жүретін болса еш нәрсе дұрыс болмайды. Балалы болған күнде балаларды үйірмеге беруге ерінбеу керек. Баланы қызықты саяхат, табиғат аясына апарған жөн. Өздері сенсе, балалары да сенеді. Армандай білу керек. «Мысалы, шыны керек біз осы балаларымыз ержетсе, сол балалардың жақсы атын естісек» - деп армандайтынбыз. Қазіргі таңда балаларымыз шүкір, жаман болып өскен жоқ. Димашымыз елдің баласы болды. соңынан ерген іні-қарындастары да неше түрлі үйірмеге қатысып, сабақтары да жақсы. Бірақ бала жақсылыққа ұмтылу үшін, ата-анасы жақсылыққа ұмтылу керек. Айналадағы өсек-аяң деген дүниелерден қашық болса, өз-өздеріне сенімді болса ғана бәрі дұрыс болады. Ер адам мен әйел адам ұлттық құндылықтан ажырамай, тәрбие берсе – бақытты болудың бірден-бір себебі сол. Балаларының болашағына сену керек. Бақытты отбасын құрудың формуласы осында», - дейді Қанат пен Света Айтбаевтар.

     Сазгер Ұлықпан мен музасы Айған Жолдасовтар да бақытты әрі өнерлі отбасылардың қатарында. Бүл шаңырақтың ұлы Болат – музыкант, қызы Фарида – эстрада әншісі. 17 жасында отбасын құрған композитор мен жұбайының әлі күнге дейін жұбы жазылмай келеді.

«Есеп шығару үшін бір ғана сан жетпейді. 3-4 санның қосындысынан не айырмасынан есеп, яғни формула шығатынын білесіздер ғой. Дəл сол сияқты бақытты отбасының формуласына да бір ғана сезім жеткіліксіз. Екі жастың басын махаббат қосады, бірақ əрі қарай отбасы болып, бір-біріне сіңіп кетуі үшін сол сезіммен қатар екі адамның бір-біріне деген сенімі керек. Сонымен қатар, отбасы болған соң түрлі қиындықтар да болу мүмкін. Сол кезде ерлі-зайыптылар кешірімшіл болу да керек. Ерді бір саты жоғары қойып, əйел адам иіліп тұрса, азаматы да мейірімді болады. Сондықтан, əркім өз орнын біліп, жанұяда сыйластық болса сезім де артып, отбасы берік болады. Бірақ осы қарапайым формуланы үйлестіріп, есебін дұрыс шығара білу де өнер. Ол үшін шыдамдылық керек. Сонда ғана отбасы бақытты болады», - дейді Ұлықпан мен Айған Жолдасовтар.

     Актер әрі тележүргізуші Қайрат Әділгерей мен әнші Бақыт Тұрманның да махаббат хикаясы көпке үлгі. «Түнгі студия» бағдарламасын тізгіндеген талант болашақ жарына 12 жасында ғашық болған. Бүгінде бұл жанұясында бір ұл мен қос қыз өсіп келеді.  

«Біз 2006-шы жылдан бері бірге өмір сүріп келе жатырмыз. 1996-шы жылдан бері бір-бірімізді танимыз. Мектеп қабырғасынан бері танитынымыз да, біздің махабаттың беріктігіне әсерін тигізді. Бір-біріміздің отбасымызды білеміз. Ата-аналар жиналысында біздің ата-анамыз бір-бірін көрген. Біріншіден, бұл жерде «махаббат» атты ұлы сезім болу керек. Ашқы махаббаттың орны бөлек қой. Өзіміздің тәжірибемізді айтатын болсам, жалпы жанұя құрылған кезде біз баламыз. Жұбайым Бақыт 19 жаста, мен 21 жаста болдым. Яғни, біз бірге дамыдық. Азамат ретінде және ата-ана ретінде. Өмірімізге соқтығыспаған, қақтығыспаған адамдар жолықты. Солардың ақылдары бізге мотивация берді. Солар сияқты болуды алдыға мақсат қойып, соны өзің қолдан жасайсың. Үлгілі, жетістікке жеткен жанұяға қарап өзіңнің отбасыңның іргетасын қалау керексің. Дәл солардай болмаса да, ұқсап бағу керек. Бастапқыдағы романтикалық сезімді әрқашан алып жүру керек. Бізде қазақтар: «Мен жақсы көремін, сүйемін» - деп көбінесе айтпайды. Сезімді білдірмейді. Сол сезімді білдіру керек. Ерлі-зайыптылар бір-біріне күнде мереке жасау керек. Адамның көңілін ауламасаң арасы суып, алшақтай береді. Сосын қарым-қатынас. Бір-бірінің сөзін тыңдау, бір-бірінің ойымен бөлісу. Бізде көбінесе: «Қатын, үйде отыр. Миымды ашытпа, не бар? Араласпа, шаруаң қанша?» - деген сияқты сөздер болады ғой. Ондай болмау керек. Бала-шаға, ұрпақ тәрбиелеу басты мақсаттардың бірі болу керек. Еркек пен әйелдің арасында үйде үйлесім болу үшін, әркім өзінің міндеттерін бөліп алғаны дұрыс. Сол міндеттер сақталып қалу керек», - дейді актер Қайрат Әділгерей.

Stan.kz