Отандық танымал әзілкеш әрі кинопродюсер Нұрлан Қоянбаев "Бизнес по-казахски в Корее" фильмінің арқасында кенелген бір миллиард 40 миллион теңге қаржысын қайда жұмсайтынын ашық айтты. Ол көпшілік өзін миллиардер атануымен құттықтап жатқанымен, кинодан келген бұл көлемді табыс толығымен өзіне түспейтінін жайып салды деп жазады KAZ.NUR.KZ "Ревю" бағдарламасына сілтеме жасап.
Фото: Instagram/koyanbayevnurlan. Коллаж: KAZ.NUR.KZ
Қоянбаев халық ойлайтындай қыруар қаржы өз қалтасына толық түспейтінін түсіндірді. Ол бұл табыстың елу пайызын кинотеатрларға берсе, тағы бір бөлігі демеушілерге тиесілі екенін жеткізді.
Әзілкештің сөзінше, өзіне сол қомақты сомманың бір еншісі ғана тиеді.
"Енді миллардер туралы бір айтып жіберейін жалпы, бәрі құттықтап жатыр ғой миллардер деп. Иә, иә деп қоям. Бірақ, бәріміз білеміз ол миллардтың бәрі маған түспейді. 50 пайызы жаңағы кинотеатрларда қалады, одан кейін салық, демеуші бар деген сияқты. Қатты байып кеткен жоқпын" , - деді ол.
Айта кетейік, бұған дейән Нұрлан Қоянбаев түсірген "Бизнес по-казахски в Корее" фильмі Қазақстан кино тарихында рекорд орнатқанын хабарлаған болатынбыз. Комедия жанрындағы туынды шетелдік "Мстители" киносынан басып озып, кинопродюсерге 1 миллиард 40 миллион теңге табыс әкелген.
