Ақтөбеде тәрбиешінің салғырттығынан екі жасар бүлдіршін күйіп қалды (фото)

Ақтөбе облысы Хромтау ауданы Бөгетсай ауылындағы балабақшада күйіп қалған кішкентай бүлдіршінге үш күн бойы ешқандай көмек көрсетілмеген деп хабарлайды өңірдегі NUR.KZ  тілшісі.

Екі жасар Нұрайдың әкесі баласын бүгін ғана ауруханаға жеткізгенін хабарлады.

«Оқиға 3 наурыз күні сағат 14:30 шамасында болды. Тәрбиеші балаларды ұйықтатып шығып кеткен. Ұйықтап жатқан менің екі жасар қызым керуетінен құлап, аяғын жылу өтіп тұрған трубаға кіргізіп алған. Қалай болғанын білмеймін, бірақ қызым керуеттің жанындағы трубадан аяғын ала алмай қалады. Сол жерде бақырып жылай берген. Тәрбиеші баламның аяғы әбден пісіп қалғаннан кейін ғана келген», - дейді әкесі Ердібек Оспан.

Балабақша қызметкерлері оқиғаны баланың үйіне хабарлап, ата-анасын шақыртады.

«Келсем қызымды тәрбиеші қолына ұстап жүр. «Баланы үйге алып кетесіз бе?» деп қарап тұр. Сол жерде балабақша медбикесіне апаруды сұрадым. Медбике бөлмесінен жарақатты сүртетін ештеңе таба алған жоқ. Ішінде қызу тексеретіннен басқа құрал жоқ. Ауылдың ауруханасынан дәкесін алып медбике жетті. Мен күйген жарақатты таңуға рұқсат берген жоқпын. Бәрі «ештеңе етпейді, жазылып кетеді» деп бізді жұбатты. Қызым үш күн бойына жылады. Тамақ ішпейді, ұйықтаған да жоқ. Әлсіреп кеткен соң бүгін жедел жәрдеммен Хромтау аудандық ауруханасына түсірдік», - дейді әкесі.

Екі жасар Нұрай Өтеген қазір дәрігерлердің бақылауында.