Әбдірахман Батырбекұлы Найзабеков

 Әбдірахман Батырбекұлы Найзабеков 1957 жылы 6 қазанда Оңтүстік Қазақстан облысында дүниеге келген. 1980 жылы Қарағанды металлургиялық комбинаты жанындағы жоғары техникалық оқу орнын тәмамдады. Техника ғылымының докторы, профессор, ҚР Жоғары мектеп ғылымдары ұлттық академиясының академигі, ҚР Жаратылыстану ғылымдары ұлттық академиясының академигі.
Оқу орнын бітіргеннен кейін Алматыда «Қызыл ту» пластмасса өңдеу зауытында учаске мастері болды. 1981-1982 жылдары - Қарағанды металлургия комбинаты жанындағы жоғары техникалық оқу орнында (Теміртау қ.) оқытушы. 1984-1987 жылдары - Мәскеу құрыш және қорытпалар институтының аспиранты. 1988 жылдан Қарағанды металлургиялық институтында оқытушы, доцент, кәсіптік-техникалық факультеті деканының орынбасары, оқу жұмыстары жөніндегі проректорының орынбасары, оқу жұмыстары жөніндегі проректоры. 1998 жылдан Қарағанды металлургия институтының (қазіргі «Қарағанды» РМК) ректоры. 2012 жылдан бастап Рудный индустриялық институтының ректоры.
300-ден астам ғылыми-әдістемелік жұмыстардың, екі монографияның, авторлық куәліктердің, патенттердің, оқулықтардың авторы. Құрметті білім қызметкері.
«Қазақстан Республикасының тәуелсіздігіне 10 жыл» (2001ж.), «Қазақстан Конституциясына 10 жыл» (2005ж.), «Ерен еңбегі үшін» (2007ж.) медалімен марапатталған.