Астанадағы жас жауынгерлер ант қабылдады
Астана, Қызылорда және Солтүстік-Қазақстан облысынан келген екі жүзден аса жас жауынгер бейімдеу кезеңінен өткен соң Отанға адалдық жөнінде ант қабылдады. Бұл салтанатқа Қазақстан Қарулы Күштерінің ардагерлері, интернационалист-жауынгерлер, әскери бөлім командирлері, және қысқа мерзімді әскери қызметкерлердің туған-туыстары арнайы шақырылды. Әскер қатарына жаңа келген жас толқын әскери тудың қасында автоматын кеудесіне қысып қаздиып тұрып, Отанға адалдық жөнінде ант қабылдады. Енді бір жыл бойы әскери өмірдің әліппесімен терең танысады. Бұл уақыт ішінде олар мотоатқыштар және артиллерия мамандықтарын игереді.
Мәселен Александр Тараканов Қызылжардың тумасы. Әскерге шақырылғанға дейін жергілікті теміржол колледжінде «техник-программист» мамандығы бойынша оқыған. «Мен өзімнің әскери қызметтерімнің әскери қызмет барысында абыройына дақ түсірмей, өз міндеттерін адал атқаруын тілеймін»,- дейді жас жауынгер.
Жалпы, «Астана» аймақтық басшылығына қарасты әскери бөлімдердің жеке құрамдары оқу-әскери жұмыстарын жандандырып, әскери дайындық пен әскери тәртіпті жетілдіріп келеді.
«Жас жауынгерлер алдағы бір жыл ішінде әскери қызметті қажет деңгейде меңгеру үшін офицерлер мен келісім-шарт бойынша істейтін әскери қызметкерлер барлық күш-жігерін аямайды. Өйткені олар- қарудан оқ атуды, әскери көлікті жүргізуді үйренуі керек, әскери және күш-қуат дайындығы бойынша белгілі межені бағындыруы тиіс»,- деп атап өтті 31775 әскери бөлімі командирінің тәрбие және идеологиялық жұмыс бойынша орынбасары подполковник Алтай Тәшкеев.
Ант беру рәсімі аяқталған соң аймақ басшылығы әскери бөлімдерінің командирлері жауынгерлердің ата-аналарымен әңгіме өткізді. Олардың сұрақтарына жауап беріп, әскери қызметкерлердің жатын орнымен, әлеуметтік-тұрмыстық жағдайымен таныстырды, казарма, асхана, спорт залдары мен оқу сыныптарын көрсетті.
С. Ақынжанов
