CNN телеарнасында – Қазақстан жайлы хабар

Американың CNN телекомпаниясы Қазақстанға арналған бағдарламаларын көрсетуді бастады. Шілденің 16-20 аралығында күн сайын эфирден берілетін топтамалардың тақырыптары да әртүрлі. Бағдарламаларды даярлау барысында шетелдік журналистер еліміздің бірқатар аймақтарын аралап қайтқан.

Шілденің 16-сынан бастап Астана уа­қы­ты­мен сағат 21.00-де телеарнадан «Қа­зақстанға көзқарас» атты бағдарлама тіз­бегі көрсетіліп жатыр. Телеарнаның қоғам­мен байланыс бөлімінің басшысы Джонатан Хоукинстің айтуынша, хабарларда ке­ніштерді игеру, шикізат өндіру, туризм, ин­фрақұрылым мен әскери техника аясын­дағы тақырыптар қамтылады. Бағдарла­­малар тізбегі шілденің 20-сына дейін күн сайын көрсетілетін болады. Бағдарлама авторлары – CNN-нің журналистері Джим Кленси мен Фред Плейтген. Авторлардың сөзіне сенсек, олар аталған тақырыптардан бөлек, Қазақстанның Тәуелсіздігі мен тарихы, халқымыз жайлы қызықты әңгі­ме­лерді де өрбітпек. Сондай-ақ аталмыш те­ле­арнаның қызметкерлері еліміздің энер­го­ресурстарына да ерекше ден қоя­тын­д­ы­ғын айтып отыр. Тіпті бағдарлама серия­ла­рының бірін түсіру барысында журналист Ф.Плейтген Қызылорда қала­сындағы жаңа мұнай-газ зауытында болды. «Қазақ­стан туристік саланы дамыту бағытында белсенділік танытып отыр. Сондықтан да бірнеше бағдарламаның тақырыбы туризм саласына арналған», – дейді Хоукинс. Бағдарлама авторлары  Қазақстан Үкіметінің аймақтағы ең ірі тау шаңғысы курортын салу жөніндегі страте­гия­лық жоспарына да аса қызығушылық танытып отыр. Сонымен қатар шетелдік журналистер Астана қаласы маңындағы фермалар­дың бірінде болып, қара ангус сиырларын өсіретін өндіріс ошағын тағы бір бағдарламаның желісіне арқау еткен.