Мектепте ұлттар достығы ұлықталды

130-дан астам түрлі ұлт пен ұлыстар мекендеген елімізде халықтар достығы әрқашан кеңінен насихатталып келеді. Бірлігі жарасқан Қазақ еліндегі халықтар достығын, татулығын өскелең ұрпақтың санасына сіңіру мақсатында осы бағыттағы түрлі іс-шаралар да білім ордаларында жиі ұйымдастырылады. 1 Мамыр – Қазақстан халықтарының бірлігі күні қарсаңында Алматы қаласындағы Иштван Қоңыр Мандоки атындағы №154 жалпы білім беретін мектепте халықтар бірлігін насихаттайтын 10 күндік фестиваль өтуде.
Атап айта кетерлік жайт, аталмыш мек­теп халықтар достығының жаршысына ай­налған білім ордасы деуге болады. Соның дәлелі 2005 жылы атақты түркітанушы ғалым Иштван Қоңыр Мандокидің есімін иеленген мектеп осы уақыт ішінде мемлекетаралық талай іс-шаралардың ұйыт­қысына айналды. Жақында Қыр­ғызстан, Венгрия ғалымдарының қатысуы­мен халықаралық конференция өткізген оқу ордасы Венгр Республикасының ел­шілі­гімен де тығыз байланыс орнатқан. Тізе берсе, аталмыш білім ордасында ха­лық­аралық деңгейдегі, ұлттар достығын насихаттайтын іс-шаралар қатары өте көп.
Оқу ордасында халықтар достығының кеңінен насихатталуының арқасында бүгінде қазақ тілінде білім алып жүрген өзге ұлт өкілдері де көп-ақ. Бұл мектептегі ха­лықтар достығының жиі насихатталуы­мен қатар, барлық ұлттың балаларын бір шаңырақтың астына жиып, бәрін бір үйдің балаларындай тәрбиелеп жатқан мектеп басшылығының бүгінгі күні беріп отырған тәрбиесін анық байқауға болады. Тіпті №154 жалпы білім беретін мектеп аралас мектеп екеніне қарамастан, қазақ тілін ана тіліндей меңгерген бүлдіршіндердің де жиі кездесуі – мектептегі білім мен тәрбиенің қатар беріліп жатқанының жемісі.
Аталмыш мектеп 1 Мамыр – Қазақстан Халықтарының бірлігі күні қарсаңында да осы бағытынан жаңылмапты. 10 күндік фестиваль барысында «Бірлік түбі – береке», «Ынтымақ – достық кепілі», «Қа­зақ­стан – көпұлтты мемлекеттің Отаны» се­кі­лді сы­нып­тарда ашық сабақтар өткізіл­се, «Татулық пен келісім – бауырластық бел­гі­сі» тақырыбында спорттық жарыстар ұйым­­дас­тырылған. Сондай-ақ «Бірлігіміз жа­рас­қан Қазақ елі» тақырыбында конфе­рен­ция ұйымдастырылып, «1 Мамыр – халықтар достығы» тақырыбында ұйым­дас­тырылған сурет көрмесі де халықтар достығын насихаттайды. Фестивальдың 6-күніне орай ұйымдастырылған «Қазақстан – достық мекені» іс-шарасында бастауыш сынып оқушылары қазақ, орыс, украин, тәжік, түрік, қырғыз ұлттарының киімін киіп, сол ұлттардың тілінде сөйлеп, өлеңін айтып, биін билеп, тіпті әрбір ұлттың ұлттық та­ғам­дарын да жасап, жиналғандарды тәнті етті. Ата-аналар да: «Мектеп қабырғасында ұйымдас­тырылатын мұндай іс-шаралардың болашақ ұрпақтың тәрбиесіне берері мол», – дейді. Сондай-ақ білім ордасында ұйым­дастырылып жатқан 10 күндік фести­вальға орай мектеп кітапханасында «Қазақ­стандағы ұлтаралық келісім» тақырыбында арнайы кітапхана мүйісі де жасалған. Фестиваль оқушылар арасында ұйымдастырылатын «Ынтымағы жарасқан тәуелсіз ел» тақырыбында ең үздік шығар­ма иелерін анықтау байқауымен қорытын­дыланады деп күтілуде.
Қаламқас АЛМАСБАЕВА, Иштван Қоңыр Мандоки атындағы №154 жалпы білім беретін аралас мектептің директоры:
– Мектебіміз көпұлтты. Оқушыла­ры­­мыз да, ұстаздарымыз да бірнеше ұлт­тан құралған. Сондықтан ұлттар достығын насихаттайтын іс-шараларды жиі өткізіп тұрамыз. «Бірлік бар жерде тірлік бар» дегендей, мектебіміздегі барлық ұлттарды ауызбірлікке үндей отырып, олардың арасында халықтар достығын қалыптастырып, патриоттық тәлім-тәрбиені де бойына қатар сіңіру басты мақсатымыз болып отыр. Алдағы уақытта елімізді көркейтіп, одан әрі дамыту жолында еліміздегі барлық ұлттың өкілдері «бір жағадан – бас, бір жеңнен қол шығарып» жұмылса, бұл, ең алды­мен, ұлт мерейі екені даусыз. Сондық­тан ынтымағы жарасқан еліміз­де рухы мықты жастарды тәрбиелеп, бі­лім пен тәрбиені қатар сіңіргіміз ке­леді.