Мекеме басшысы азаматтарды қабылдады

Сүрінбейтін тұяқ, қателеспейтін адам болмайды. Ал сол қателескен азаматтардың кемшілігін бетіне басып, тұқыртып, қоғамнан аластауға асықпаған дұрыс. Олардың да жақыны, туыстары бар. Қанша қылмыс жасаса да туыстары оларды күтеді, жамандыққа қимайды, өмірді жаңаша бастайтынына сенеді. Жазасын өтеушілердің туыстары азаматтарды қабылдау күнінде осы секілді сан сауалын түзеу мекемесінің басшыларына қойып, оларға тұшымды жауап алуға толық мүмкіндік алады.

Жалпыреспубликалық бірыңғай азаматтарды қабылдау күні барысында Жамбыл облысы бойынша Қылмыстық-атқару жүйесі департаменті ЖД-158/1 мекемесінің бастығы әділет подполковнигі Бауыржан Сауранбаев бірқатар азаматтарды қабылдады.

Қабылдауға келген азамат Б.Абиров жазасын өтеуші жұбайының ІІ топтағы мүгедектігі бойынша анықтамасының мерзімі аяталатынын ауызша хабардар етіп, бұл мәселені тексеру комиссиясының қайта қарауын өтінді. Келесі кезекте өтінішімен жүгінген А.Алтенова құжаттарды қайта рәсімдеу үшін аталған мекемеде жазасын өтеуші жолдасының атынан сенімхат берілуін сұрады.

Қабылдауға келгендерді мұқият тыңдаған мекеме бастығы Бауыржан Әбуұлы сотталғандар мен айыпталушылардың құқықтарының бұзылмауы және олардың денсаулығы қатаң қадағалауда екенін баса айтып, жеке қабылдауға келген азаматтардың өтініштері заңға сәйкес қанағаттандырылатынын жеткізді.

Мекеме бастығы Б.Сауранбаевтың айтуынша, республика көлемінде өткізіліп жатқан мұндай шара қарапайым халықтың мемлекеттік органдармен байланысын арттыра түсуіне өз септігін тигізбек.

- Республикалық бірыңғай азаматтарды қабылдау күні аясында көкейіндегі сан сауалға жауап таппай жүрген бірқатар азаматтарды қабылдадық. Жалпы, мұндай шара барысында тұрғындар өздерін мазалаған сұрақтарына заң жүзінде жауап ала алады, - деді Б.Сауранбаев.