Сарыағашта банан өсіріле бастады

Соңғы жылдары Оңтүстік Қазақстан облысының шаруалары ауыл шаруашылығы саласына біржола ден қоя бастады. Соның айғағы тіпті тропикалық жемістерді де күнгейге жерсіндіре бастағаны. Бұл туралы сол кездегі облыс әкімі Бейбіт Атамқұлов мырза жыл басында таң қалысын да жасырмаған еді.
"Оңтүстіктегі егiн алқабы 773 мың гектарды құрайды. Оның ішінде суармалы жер аумағы 440 мың гектарға жетiп отыр. Облыс бойынша жылыжайлардың жалпы көлемi бүгiнде 1025 гектарды құрайды. Соның iшiнде бiз өткен жылы 115 гектар аумақта жылыжайды iске қостық. Еліміздегі жылыжайлардың 87 пайызы Оңтүстік Қазақстанға тиесілі. Соның 50 пайызы Сарыағашта орналасқан. Сарыағашқа барғанда банан өсіріп жатқан шаруаны көрдім. Шынымды айтып таң қалдым. Өздерінен сұрағанда экспримент ретінде өсіріп жатқандарын айтты", – дейді Б. Атамқұлов. Расында да банан секілді жемістер елімізге толықтай шекара асып жеткізіледі. Елімізде өсіру туралы ойламай да келсек, күнгейдегі дихандар бұл жемісті де жерсіндіру туралы ойлай бастағанын байқаймыз. Бұған дейін Оңтүстікте лимон да өсіріле бастағанын айтсақ, алдағы уақытта мұндай тропикалық аймақта өсетін жемістерді өз туған жеріміздің өнімі ретінде дәм тата бастауымыз әбден мүмкін.

Сарыағаштағы шаруа Танабай Шынтасов жетекшілік ететін "Жер сыйы" ЖШС тұқымбағы, "Ынтымақ-Бесарыс" ЖШС секілді шаруа қожалықтары осындай шаруалардың қатарына жатады. Бұл серіктестіктерде түрлі жеміс және субтропикалық, декоративтік көшеттер өсіріледі. Сондықтан алдағы уақытта Сарыағаштық дихандардар күтер үміт мол болып тұр.