Талап бар жерде табыс та болады

Кең-байтақ қазақ жерінің қасиетті бір бұ­рышы – саялы Сарқан өңірі өзінің көркем та­­биғатымен ерекшеленеді. Бұл өңірдегі шың­дары көк тіреген асқар таулар қазақтың жанына сондай жақын сайын далаға ұштас­са, құмды өңірі айдынына көз жетпес Көкше теңізге барып тіреліп, бір-бірімен өзгеше жа­ра­­сымын табады. Бабадан қалған бақ мекен­нің қойнауы да құт, беткейі мыңғырған малға толы, түгін тартса майы шығатын топырағы да құнарлы. Содан кейін де мұнда жеміс-жидек пен көкөністің, дақылдың сан түрі өседі. Сар­қан ауданының әкімі Ерғазы Қошанбе­ков­пен сұхбатымыз осы өңірде атқарылып жат­қан жақсы істер жайында өрбіді.

– Ерғазы Қошанбекұлы, ең ал­ды­мен, оқырмандарды өзіңіз басқарып отырған Сарқан ауданы жайындағы мәліметтермен таныстырып өт­сеңіз. Саялы Сарқан өңірі облы­сы­мыз­дың басқа аудандары мен қала­ла­рынан несімен ерекшеленеді? Өңірге алғаш келген адамды аудан несімен таңғалдырады?

– Жер жаннаты Жетісу өңірінің шұ­райлы пұшпағының бірі болып табылатын Сарқан ауданы 1928 жылы шаңырақ кө­терген екен. Алғашында орталық ретінде Лепсі елді мекені таңдалып алынса, 1935 жылдан бастап Сарқан ауылы аудан орта­лығына айналған. Түбегейлі өзгерістер орын алған 1997 жылы аудан құрамына Бөрлітөбенің 4 ірі елді мекені қосылды.

Аудан табиғаты ауылшаруашылығын өркендетуге қолайлы. Басын таудан ала­тын арынды өзендері суармалы егістік кө­лемін молайтуға мол мүмкіндік береді. Тау баурайында орналасқан Алматы қала­сы секілді Сарқанның да апорт алмасы­мен, басқа да жеміс-жидегімен аты шық­қан. Ал таудан төмен жазыққа түссеңіз, бұл жер­ден құнарлы егістік алқаптары бас­талады. Мұнда өспейтін дақыл, өн­бейтін өсімдік жоқ десек, ешбір асырып айтқандық бола қоймайды.

Өңірдің туристік әлеуеті де жоғары. Олай дейтініміз, аудан аумағында ежелгі Қойлық қаласының, «төрткүл» деп атала­тын қадым замандағы шағын елді мекен­дер қорғандарының орындары бар. Азамат соғысы кезіндегі әйгілі Черкасск қорғаны­сының шептері біршама жақсы сақталған. Сол оқиғаны есте қалдыру мақсатымен ұйымдастырылған «Черкасск қорғанысы» мұражай кешені жұмыс істейді.

Сарқандықтар осы өңірден шыққан Бұғыбай батыр мен Шиырбай шешен, Құл сері, Көтентәуіп бабаларды орынды мақ­тан етеді. Қасиетті топырақта дүниеге келген Алаштың айтулы азаматы Мұ­ха­метжан Тынышпаев пен сазгерлер Мұқан Төлебаев, Еркеғали Рахмадиев, Күнсайын Қуатбаев, қаламгер Кәкімжан Қазыбаев, ғалым Мұхтар Арын, өнер тарландары Құман Тастанбеков пен Сара Тыныш­тығұлова, ақындар Әділбек Абайділданов пен Жаскілең Қалиев, балуандар Әбілсейіт Айханов пен Аманжол Бұғыбаев та бүкіл қазақ еліне танымал тұлғалар. «Гүл өскен жерге гүл өседі» дегендей, тарихы терең, әлеуеті ерен өңірден әлі де талай даңқты азаматтардың шығатыны анық.

– Осындай ауданға басшылық қызметке келгеніңізге де біраз уақыт болыпты. Алғашқы нәтижелер қан­дай? Әкім лауазымындағы жұмы­сы­ңызды неден, қандай проблеманы шешуден бастағаныңызды әңгімелей кетсеңіз. Қазіргі уақытқа дейін ше­шімін таппаған ондай мәселелер бар ма?

– Менің Сарқан ауданына әкім бо­лып тағайындалғаныма бір жылдың жүзі бол­ды. Мұның өзі бір қарағанда онша көп те уақыт емес секілді. Алайда салыстырмалы түрде алып қарағанда осы уақыт ішінде ауыз толтырып айтарлықтай оң өзгері­с­терге қол жеткізілгенін байқауға болады. Мәселен, өткен 2014 жылдың тоғыз айын­дағы көрсеткіштермен салыстырғанда биылғы жылдың қаңтар-қыркүйек айла­рындағы өнеркәсіп өнімі көрсеткіші 20,7 млн. теңгеге, ауылшаруашылығы өнімінің көлемі 640,4 млн. теңгеге көбейіп, шағын кәсіпкерлік субъектілері өндірген өнім көлемі 55 млн. теңгеге, шағын кәсіпкерлік бойынша бюджетке салықтық аударымдар мөлшері 46,8 млн. теңгеге артты. Бір мезгілде негізгі капиталға инвестициялар мөлшері 288,3 пайызға ұлғайды.

Аудан мал бордақылау алаңдарын са­лудан кенжелеп қалған екен. Соған орай біз биылғы жылы осындай 3 алаңды іске қосқалы отырмыз. Мәселен, «Манай би» агрошаруашылығы 1500 бас ірі қараға, «Дәуренбек» шаруа қожалығы 500 басқа арналған осындай алаңдарды өз қаржы­сына салып, дайындық қалпына келтірді. «Мәкетов» шаруа қожалығы болса 200 басқа арналған мал бордақылау алаңын жақын арада іске қоспақшы. Ендігі мақсат – осынау алаңдарды малға толтырып, то­лық қуатында жұмыс істету.

Сүтті сиырлар болғанымен ауданда сүт өндіретін ферма жоқ. Бұл мәселені шешу үшін «Қазагрофинанс» АҚ арқылы 70 млн. теңгеге 100 басқа арналған тауарлы-сүт фермасын салуды қолға алдық. Бұл жұмыс биылғы жылы аяқталып, келесі жылдың көктемінде тауарлы-сүт фермасы жұмы­сын бастайды деп күтілуде.

«Сыбаға», «Алтын асық», «Құлан» бағ­дарламаларын жүзеге асыру бағытында жоспарлап отырған жұмыстарымыз да қомақты. Шаруа қожалықтарының бас­шыларына бұл бағдарламалардың мәнін түсіндіріп, жоспарда белгіленгеннен артық мөлшерде мал сатып аламыз деп отырмыз.

Сарқан ауданы бойынша 30 мың гек­тарға жуық суармалы алқап бар. Осы алқаптың 21 мың гектарына осы уақытқа дейін соя дақылы өсіріліп келген екен. Біз биыл аталған дақыл егістіктерінің көлемін 1,5 мың гектарға азайттық. Оның өзіндік себебі де бар. Басты себеп, жылда еге бе­ре­тін болса, соя егістік жердің құнарын жойып жібереді. Сондықтан оның орнына басқа тиімді дақылдар өсіру жайын ойлас­тырудамыз.

– Осы жерде қызылша дақылын өсіру жайын айналып кете ал­май­мыз. Биыл бұл мәселемен Сарқан ау­даны тұрғындарының да шындап айналыса бастағанынан хабар­дар­мыз. Бұл орайдағы жұмыстың ал­ғаш­қы нәтижесі қандай? Елбасы­мыз­дың бұл орайдағы тапсырмасы қалай орындалуда?

– Елбасымыз Нұрсұлтан Назарбаевтың тапсырмасына, соған орай облыс әкімі Амандық Баталовтың қойып отырған талабына сәйкес қызылша егістігінің көлемін жылдан-жылға көбейтуіміз қажет. Бұл орайда біздің аудан көлемінде де жүйелі жұмыстар атқарылуда. Нақтырақ айтатын болсақ, аудан аумағында бұған дейін небары 200 гектар алқапқа қант қызылшасы өсіріліп келген болса, биылғы жылы бұл көрсеткіш 750 гектарға жеткі­зілді. Келер жылы межені 1200 гектарға дейін көтеруді мақсат тұтып отырмыз. Осылайша қант қызылшасы алқаптары­ның көлемі жылдан-жылға арта түсетін болады.

Биылғы жылы алпысқа жуық шаруа қожалығы осы жұмыспен айналысып, белгілі бір жетістіктерге қол жеткізді. Сө­зіміз дәлелді болу үшін Бақалы ауы­лын­дағы «Аққұдық» шаруа қожалығының бас­шысы Серікжан Есімжановтың қарама­ғын­дағы 32 гектар жердің әр гектарынан 700 центнерге жуық өнім алғандығын айта кетуге болады.

Облыс басшылығының жанды көме­гінің арқасында Көксу қант зауытымен келісім­шарт жасасып, атқарылған жүйелі жұмыс­тардың алғашқы жақсылықтарын көріп те жатырмыз. Басқа сөзбен айтатын болсақ, шаруалар қызылшаның басқа да­қыл­дардан гөрі тиімді екеніне, бұл мақсатқа жұмса­лын­ған қаржының еселеп қайта­ты­нына көздерін нақты жеткізіп отыр.

– Облыс әкімі Амандық Баталов өсу нүктесі ретінде әрбір аудан мен қалада индустриалды аймақтар құру қажеттігін айтып келеді. Аудан аума­ғында осы тапсырма негізінде атқа­рылып жатқан жұмыстар бар ма?

– Индустриалдық алаң құру туралы тап­сырманы орындау мақсатында ауданда 14 гектар жер бөлінген екен, соның 7 гектарын қойма, астық сақтайтын орын салу үшін жеке кәсіпкерлерге беріп отырмыз. Солар­дың қатарында «Райымбек сүт» деген се­ріктестік соя өнімдерін сақтайтын қойма, оны тереңдете өңдеуден өткізетін цех салу мақсатымен 3,5 гектар жер алды. Осы жерде «Темірлан» серіктестігі құбыр шығаратын цех құрылысын жүргізуді жоспарлап отыр. Қазіргі уақытта ол жерге қажетті инфра­құрылым жасау жұмыстарын қолға алу­дамыз.

– «Балық та байлық көзі» деп жа­тамыз. Сол байлықты орнымен пай­даланып, ел игілігіне жарату жайы қандай дәрежеде? Осыдан біраз уақыт бұрын Төлебаев ауылында балық қа­был­дап, оны тереңдете өңдейтін кә­сіпорын құрылған еді. Ондай кәсіп­орындардың қазіргі жағдайы қандай?

– Балқаш көлінің жағалауындағы 4 шаруа қожалығы балық аулаумен шұғыл­да­нады. Бірақ соңғы жылдары көл айды­нын­дағы балықтың азайып кетуіне бай­ланысты бұл шаруаның онша тиімді болмай тұрған­дығын мойындауымыз керек. Әйт­песе балық қабылдайтын орын да, оны қабыл­дайтын азаматтар да бар.

Өнім аз болғаннан кейін оны өңдеуден өт­кізудің де тиімсіз болатыны белгілі ғой. Балық қабылдап, оны тереңдете өңдеу жұ­мысының алға баспай тұрғандығына негізгі себеп те осы балықтың азайып кетуі ғой деп ойлаймын.

– Ауданда түйеқұс өсіріп, дәрілік шөп­тер дайындайтын кәсіпкерлердің барлығы­нан хабардармыз. Бізге таң­сық көрінетін мұндай шаруаларды алға бастыру, дамыту мүмкіндіктері бар ма? Экономиканы дамы­тып, тұр­ғындарды жұмыспен қамтудың басқа қандай мүмкіндіктерін іске қосуға болады?

– Түйеқұс өсіруді біраз жыл бұрын жеке шаруа қолға алған болатын. Алайда оның басы сол кездегіден көп өсе қойған жоқ. Жұмыртқасы мен еті қымбат болғанымен оны өсірудің де шығыны көп сияқты ғой. Ал дәрілік шөп жинап, өсірумен «Азия Бок» деген серіктестік айналысады. Олар былтыр 100 гектар жерге дәрілік шөп ексе, биыл мұн­дай шөп алқабының көлемін 150 гек­тарға ұлғайтты. Бұрындары өздеріне тиесілі жерлері жоқ болатын, қазір заңдастырып жер бердік. Өнімдерінің сұранысқа ие бо­лып отырғанының белгісі болар, бүгінде дәрілік шөптерді сырт елдерге экспортқа шығара бастады. Өндірісті ұлғайту, дамыту мақсатымен олар қазір үлкен бір зауыттың құрылысын бастады. Кәсіпкердің заманауи жабдықтар әкеліп, осы заманғы биік талап­тарға сай келетін өндіріс орнын ашамын деген берік уәдесі бар.

– Қойлық алмасының даңқы алыс­қа кеткен. Мұнда жеміс-жидектің не­бір түрі өседі. Сондай жеміс-жи­дек­ті қайта өңдеуден өткізіп, дайын өнім деңгейіне жеткізетін кәсіпорындар құрылса жаман болмас еді...

– Сарқан алмасының даңқы расында алысқа кеткен. Аудан аумағында 971 гектар жерде алма бағы өсіріледі. Оның барлығы жекеменшіктің қолында.

Осыдан үш жыл бұрын Франциядан әкелінген жеміс ағаштары 100 гектар ал­қап­қа орналастырылған болатын. Осы заманғы озық технология бойынша тамшылатып суа­рылатын бұл бақтан келер жылы мол өнім күтіп отырмыз. Соған орай алдағы жылы өнімді сақтайтын үлкен қойма құры­лысы басталады.

Итальяндық «Техносервис люкс» деген фирмамен келісімшарт жасалғанның арқа­сында 30 гектар жерге питомник ұйымдас­тыру мәселесі де шешімін тапты. Бұл пи­томникте будандастырылған жеміс ағаш­та­рының көшеттері алма өсіремін деген қо­жалықтармен қатар жеке адамдарға да са­тылатын болады. Келешекте осы жерден тағы 100 гектар жеміс бағы бой көтермек. Жеміс бақтары алқаптарын көбейту жайына келгенде бұрынғыша алманың апорт түрін өсіруге басымдық беріліп отыр.

– Сарқанда сүт зауытының жұ­мысы қайта жаңғырып, аудан соңғы жылдары сүт және сүт өнімдерімен танымал бола бас­тады. Жиһаз жасап, одан басқа да тірлікпен айналысатын ағайындар баршылық. Соған байла­нысты шағын және орта бизнестің дамуы жайын да қозғай кетсеңіз.

– Сүт зауыты бұрындары күніне 2 тонна сүт қабылдаса, қазір бұл көрсеткішті 8 тон­наға жеткізіп отырмыз. Әр елді мекенде сүт қабылдайтын орындар жабдықталып, оған арнайы адамдар бекітілген. Тереңдете өң­деу­ден өткізілген сүт өнімдері бүгінде аудан аумағынан асып, Талдықорған қала­сының тұрғындарына да танымал бола бастады. Мұның өзі кәсіпорын өнімінің бәсекеге қабілеттілігінің де артып келе жатқандығын білдірмей ме? Әрине, мұндай жетістіктердің көңіл қуантатыны сөзсіз.

Шағын және орта бизнесті дамыту мақсатында ауданның 30 тұрғынына төменгі пайызбен 60 миллион теңге несие берілді. Жалпы соңғы үш жылда мұндай несиеге 88 адам ие болған екен. Олар бұл қаражатқа шаштараз, кафетерийлер ашып, шаруа қожалықтарын ұйымдастырды. Қазіргі уақытта біз берілген несиелердің мақсатты жұмсалынуына бақылау жасап отырмыз.

– Аудан аумағында асау өзендер бар­­шы­лық. Сондай өзендердің әлеуе­тін пайда­ла­нып, электр энергиясын өндіру жайы да қарқын ала бастаған сияқты.

– Өңірімізде басын таудан алатын ағысы қатты бірнеше өзен бар. Оның суы негізінен егістік жерлерді суаруға жұмсалынады. Де­генмен, соңғы кездері бұл өзендердің бойы­на су электр стансыларын салу қолға алына бастады. Бұл орайда келер жылдың қаңтар айында «Лепсі – 2» СЭС-інің бірінші тора­бы­ның 17 мгВ ток беретіндігін айта кет­ке­ні­міз жөн болар. Сол сияқты «Басқан – 2» СЭС-і де осы жылы электр энергиясын өндіре бастайды. Осынау 2 су электр стан­сысы жалпы алғанда 21 мгВ ток өндіретін болады. Мұның өзі, біріншіден, инвестиция, екіншіден, жаңа жұмыс орындары, үшін­шіден, арзан қуат көзі болып табылады.

– Теңгенің құнсыздануына бай­ла­нысты азық-түлік пен халық тұ­ты­натын басқа да тауарлар баға­сының көтеріліп бара жатқаны белгілі. Баға­ны аз да болса тұрақтандыру үшін қандай жұмыстар атқарылуда?

– Аудан әкімдігінің «Аудан бойынша бағаны тұрақтандыру жөніндегі жұмысшы комиссиясын құру туралы» қаулысымен ар­найы топ құрылып, бағаның шарық­та­мауы мәселесімен айналысуда. Жұмысшы тобы аудан аумағындағы базарлар мен ірі дү­кен­дер, наубайхана иелерімен, жанар-жағармай сатушылармен жиналыстар өткізіп, түсін­діру жұмыстарын жүргізуде. Әлеуметтік көмекке мұқтаж азаматтар мен отбасылар ті­зімі бекітіліп, әлеуметтік дүкендерге беріл­ген. Бір мезгілде облыс әкімінің тапсырма­сын орындау мақсатында ауданда бағалар мен тарифтердің өсуін тежеу жөніндегі жедел штаб құрылған. Бүгінгі күнге дейін штабтың 3 отырысы өткізіліп, туындаған өзекті мәселелер жайында тиісті шешімдер қабылданды.

Әлеуметтік маңызы бар азық-түлік, дәрі-дәрмек түрлеріне, жол, көлік ақысына, жа­нар­майға мониторинг жүргізіліп тұрады. Ау­данда баға тұрақтылығына байланысты «сенім телефондары» қойылған. Мұндай телефондарға шағым, дабыл түсе қалған жағ­дайда штаб тарапынан жедел қарас­ты­рылып, шағым иесіне жауап қайта­ры­лады.

– Ауданның табиғаты тамаша, соған орай туризмді, оның ішінде тау және аңшылық туризмін дамыту мүмкіндіктері мол. Бұған ЮНЕСКО-ның тарихи ескерткіштері тізіміне енген Қойлық секілді көне шаһардың орны, әйгілі Черкасск қорғанысы мұра­жайын қоссақ, ауданның туристік тартымдылығы тіпті арта түседі.

– Туризм саласы бойынша Жоңғар Ала­тауы Ұлттық паркінде 7 маршрут белгі­леніп отыр. Одан басқа, Балқаш көлінің жаға­лауында суға түсу-демалыс аймағын құру үшін 500 гектар жер бөлінген. Шындығына көшсек, бұл жерлерді әлі ешкімге бере қойған жоқпыз. Көл жағалауынан жер алуға өтініш білдіргендерге жағажайға заманауи демалыс нысандарын, 3 немесе 4 жұлдызды қонақүйлер салуларың керек дегендей та­лаптар қойып отырмыз. Әзірге мұндай жо­ғары талапқа сәйкес келетіндей ұсыныс екі кәсіпкерден ғана түсіп отыр.

Өтініш білдіргендерге жерді таратып бере салсақ, олар бүгінгі күннің ғана қамын ойлап, қарабайыр құрылыстарды қалқайта салуы мүмкін. Оған жол беруге болмай­тынын бірден кесіп айтуымыз керек. Бүгінгі күн талабы осындай. Жағажайды көр­кей­ту жөніндегі жұмыстар ойдағыдай жүзеге асқан жағдайда Балқаш көлінің жағасынан осы заманғы демалыс аймағы бой көте­ретін болады.

Қазіргі кезде демалыс аймағына алып баратын жолдарды жөндеуге қаржы қарас­тырылуда. Биылғы жылы бұл бағыттағы жолдарға ағымдағы жөндеу, келесі жылы күрделі жөндеу жұмыстары жүргізіледі.

Қойлық шаһарының ЮНЕСКО тізі­міне енген тарихи ескерткіштер қатарына қосыл­ғандығы белгілі. Соңғы уақытта аталған дүниежүзілік ұйым өкілдері шаһар жөнінде қосымша мәліметтер сұ­ра­тып, көне қала орынын әлемдік дең­гейдегі туристік ны­санға айналдыру ниеттерін білдіруде. Әри­не, бұл үшін де жаңағыдай сервистік қыз­мет көрсету деңгейін көте­руіміз қажет.

Черкасск қорғанысы мұражайы жайын­­да бірер сөз. Енді бірнеше жылдан соң аталған тарихи оқиғаның болғанына 100 жыл толады. Соған орай келесі жылы мұражайды күрделі жөндеуден өткізу үшін күрделі қаржы сұрап, жобалық-сме­талық құжаттарын дайындап жатыр­мыз. Облыс әкімі Амандық Баталов ауданы­мызда болғанда жағдайды көзбен көріп, уәдесін беріп кетті. Ендеше бұл орайдағы жұмыстар да өз деңгейінде атқарылады деп тұжырымдауға негіз бар.

– Сарқан қаласында Мұха­мет­жан Тынышпаевтің ескерткіші асқақтап тұр. Аудан аумағында Мұ­қан Төлебаевтың кіндік қаны там­ған, бүгінде талантты сазгердің есімімен аталатын елді мекен бар. Сондай ұлылардың мұрасын наси­хат­тап, бүгінгі ұрпаққа үлгі ету жұмыстары қандай деңгейде?

– Бұл бағытта да жүйелі жұмыстар ат­қарылып жатыр деп сеніммен айта ала­мын. Аудан мектептерінде өңірімізден шық­қан айтулы тұлғалардың, соның ішін­де жаңа өзіңіз айтып өткен Мұха­метжан Тынышпаев пен Мұқан Төлебаевтардың өмір жолдары мен шығармашылық, қай­рат­керлік қырлары тереңдете оқытылады.

Мұхаметжан Тынышпаевтің кіндік қаны тамған киелі топырақ – Черкасск ауылдық округі аумағындағы Қарғалы елді мекені. Жоғарыда айтып өткенімдей, мұнда Черкасск қорғанысы мұражайы жұмыс істейді. Сол мұражайда қазақ тари­хында өзіндік із қалдырған қайраткер ағамызға арнап арнайы бұрыш ашылып, бюсті қойылып, тарихи мәліметтер жинақ­талған. Десек те даңқты жерлесіміздің есі­мін ардақтау мәселесіне мұнымен нүкте қойылмайды. Бұл орайда Қарғалы ауы­лын­дағы орта мектепті Мұхаметжан Ты­нышпаевтің есімімен атау жөніндегі ұсы­нысты облыстық ономастика комис­сия­сына беріп қойғанбыз. Қазіргі кезде бұл ұсыныс республикалық ономастика ко­миссиясының қарауында жатыр. Мо­ра­торий аяқталып, сәтін салса келер жылы мектепке Тынышпаев есімі беріледі деген ойдамыз.

– Бүгінгі сапарымыз ақын, Қазақ­стан Жазушылар одағының мүшесі Жомарт Игіман кітабының тұсау­кесер рәсіміне орайластырылып отыр. Бұл шараның жоғары дең­гейде ұйымдастырылғаны бірден бай­қалады. Соған орай тағы бір сұ­рақ – өңірде тірлік кешіп келе жат­қан таланттарға қамқорлық жасау жағы қандай дәрежеде? Әкімі ақы­нын іздесе қуаныштың үлкені сол емес пе?

– Расында сіздердің сапарларыңыз ауданымыздың мәдени өміріндегі үлкен бір оқиғаға, айтулы қуанышқа тап келіп отыр. Бүгін біз ауданымызға ғана емес, облысқа, республикаға белгілі ақын, жазу­шы Жомарт Игіманның кітабының тұсау­кесер шарасын өткізейік деп отыр­мыз. Мұндағы мақсат – қаламгер шығар­машы­лығын дәріптеумен бірге жастардың әде­биет пен мәдениетке, өнерге, соның ішін­де поэзияға деген құлшыныстарын, қызы­ғушылықтарын ояту. Сол себептен де ша­раға жастар қауымын көптеп қатыс­тырып отырмыз. Олар Жомарт Игіман мен оның қуанышына алыстан ат терлетіп келіп отырған әріптестері – белгілі ақын-жазу­шылардың тұсаукесер рәсімінде сөйлеген сөздерінен, оқылған өлеңдерінен үлкен әсер алады деген ойдамын.

Халқымызда «Ақынын ардақтаған ел азбайды» деген жақсы бір тәмсіл бар. Сол айтқандай, ауданымыздың атын шығарып жүрген ақынымызды бүгінде қалай ардақ­тасақ та жарасады. Өзім де Нұрлан Ораза­лин мен Жүрсін Ерман, Әміре Әрін сияқ­ты ақындардың өлеңдерін оқып тұрамын.

– Кезінде Күрті, Балқаш аудан­да­рында басшылық қызметтер ат­қа­рып, одан кейінгі жерде «Нұр Отан» партиясы облыстық филиалы төр­аға­сының бірінші орынбасары лауа­зымында жұмыс жасадыңыз. Пар­тиялық жұмыс тәжірибесі әкімдік қызмет барысында қаншалықты пайдаға асты деген сұраққа да жауап бере кетсеңіз.

– Аталған аудандар мен «Нұр Отан» партиясы филиалында атқарған қызмет мен үшін өмір мектебіне айналды. Ал Сарқан ауданындағы басшылық қызметім, біріншіден, маған Алланың берген сыйы шығар, екіншіден, облыс, республика басшыларының көрсеткен үлкен сенімі деп есептеймін. Сондықтан да мен осы сенімді ақтап, халықпен етене жұмыс істеуге, олардың мұң-мұқтажын өтеуге бар күшім мен мүмкіндігімді жұмсайтын боламын. Оған ешқашан шаршап, шал­дықпаймын. Барлық білімім мен білігімді, тәжірибемді осы мақсатқа жұмсасам дей­мін.

Жаңа айтып өткенімдей, «Нұр Отан» партиясы филиалында қызмет істеген жыл­дары мен шыңдалу мектебінен өттім. Партия, оның ішінде Елбасымыздың пар­тиясы қашанда жоғары тұрады емес пе? Бұл жерде көпшілікпен тіл табысып, ха­лықтың мұң-мұқтажын тыңдай білу мә­се­лесі алдыңғы орынға шығады. Мен «Нұр Отан» партиясы филиалында басшылық қызметте жүргенімде есімі бүкіл елімізге белгілі қоғам, өнер, мәдениет қызмет­керлерімен араластым, олармен сапарлас, дастарқандас болып, көпшіліктің алдына бірге шықтым. Партия съездері мен кон­фе­ренцияларына бірге қатысып, қоян-қолтық жұмыс жасадық. Мұның бәрі, жаңа айтып өткенімдей, өмір мектебіне айналды. Жалпы «Нұр Отан» партия­сында қызмет істеген азаматтардың жаман болмайтындығы айқын.

– Қандай сұрақ қойылмай қал­ды деп ойлайсыз?

– Бұл орайда мен халықтың, әсіресе жастардың еңбекке араласуы мәселесін қозғай кеткім келеді. Өйткені еңбексіз қан­дай да болсын табысқа қол жеткізу мүмкін емес. Содан кейін де жастар дайын тамақ пен киімнің өмір бойы алдыңнан шыға бер­мейтінін, оны табу үшін еңбек­тену қа­жеттігін біліп өсулері керек. Абай ата­мыз­дың «Еңбек етсең ерінбей, тояды қарның тіленбей» деген қағидасын әрбір азамат, әрбір жас жүрегінде сақтаса жаман болмас едік. Қазіргі жастарға «ана шаруа қожа­лығының егінін орып, малын бағу керек» десең, «мен оларға малай боламын ба?» деп өретүрегеледі. Ондай психологияға бой ұрмау керек.

Сөз орайы келгенде айта кетейін, ау­данымызда жастардың бос уақытын маз­мұнды ұйымдастыруға жақсы жағдайлар жасалған. Мәдениет үйлері мен кітап­ха­налар, саябақтар мен оқу орындарының спорт залдары осы мақсатқа жұмыс іс­тейді.

Нүсіпбай ӘБДІРАХЫМ