Жаңашыл шаруалар ғана субсидия алады

Оңтүстік Қазақстан облысында 50 мыңнан астам шаруа қожалығы бар. Жыл он екі ай жер тырмалап, еңбек еткен осы дихан қауымы күзгі жиын-терім кезінде еңбегінің жемісін көреді. Несібесін жерден тауып отырғандар алған өнімнің мол болғанын қалайды. Ол үшін шаруаларға мемлекет те көмек қолын созып келеді. Шаруаларға көп жылға жеңілдетілген лизингтік техникалар несиелер беріледі. Мемлекет тарапынан дихандарды қолдау бағытында атқарылып жатқан игі істер көңілді тоғайтады.

- Шаруаларға берілетін жеңілдетілген несие мөлшерін 18 миллион теңгеге дейін жеткізу, оның мерзімін бес жыл емес жеті жылға дейін ұзарту көзделіп отыр. Гектар бойынша берілетін субсидияны қайта қалпына келтіруге әрекет жасалып жатыр. Оған ұлттық қордан қаржы бөлу мәселесі шешілетін болса, 15-ші қарашадан бастап бұл қаржы шаруаның қолына тиюі тиіс. Әзірше бұл субсидия мақта, жүгері, күріш дақылдарына беріледі. Келесі жылы гектар бойынша берілетін субсидияны мамыр айына дейін кешіктірмей беруді ойластырып отырмыз. Шаруаның өндірген мақтасының әр тоннасына да көбірек қаржы беруді шешсек дейміз, - дейді жергілікті дихандар.
Шаруа қауым еңбек етсе ғана оның нәтижесі болатындығын бүгінде жақсы түсінеді. Сонымен қатар, диқандар мемлекет тарапынан берілетін қаржылай қолдауларды да тиімді пайдалануда. Себебі бұл қаражаттардың тигізіп жатқан септігі зор. Жалпы, аграрлық саланы дамытуға Үкімет тарапынан беріліп жатқан субсидияның мөлшері жылдан-жылға ұлғайып келе жатыр. Мысалы, қазір жердің құнары төмен болғандықтан, оған тыңайтқыш сеппей, өнім алу мүмкін емес. Бұл үшін мемлекеттен биыл 2,260 млрд теңге қаралды. Яғни, былтырғыға қарағанда 5 мың тонна артық тыңайтқышқа субсидия берілді. Дербес арам шөптерге қарсы химикаттарды алуға да мемлекет жәрдем береді.