Түйенің сүті барлығымызға қолжетімді деп айта алмаймыз. Әсіресе, қала тұрғындары шұбатты ауылдан іздеп, әуре-сарсаңға түсіп жатады. Шұбатты ауыл, қала тұрғындарына қолжетімді еткен кәсіпкер Нұрлан Серікбайұлы осыдан алты жыл бұрын түйе сүтін өңдеуді қолға алады. Отырар ауданы Маяқұм ауылында орналасқан "Үсенов Н" шаруа қожалығы бүгінде шұбатты бір литрлік ыдысқа құйып, сатылымға шығарады, - деп хабарлайды "Алаш айнасы" rgmedia.kz порталына сілтеме жасап.
.png)
Әрине, кәсіпті бастау оңайға соққан жоқ. Қожалық иесі алдымен Түркіменстаннан 376 бас асыл тұқымды "Дромодер" түйелерін әкеліп, ауыл жайылымына бейімдеген. Кейіннен "Үдемелі индустриялық-инновациялық даму" бағдарламасына жүгінген ол мамандардан кеңес алып, кәсібін өркендетуге қаражат алады. Аталған қаржыға тәулігіне 5 тоннаға дейін шұбат дайындайтын арнайы заманауи қондырғы сатып алған. Алғашқы жылдары 400 тоннаға дейін шұбат өндірсе, енді оны 500-ге жеткізуді көздеп отыр. Қазір мұнда 2500 литр шұбат өндіріледі. Түйе сүтінің адам денсаулығына пайдасының зор екені айтпасада түсінікті. Бiр литр шұбат ересек адамның В1, В12 және С дәрумендеріне деген қажеттілігін қанағаттандыра алады. Дәстүрлi сусын сонымен қатар iшек, бауырды тазалап, өт жолдарының жұмысын жақсартады. Қышқыл бөлудi тездетiп, асты жылдам қорытуға септiгiн тигiзедi. Айран мен сүтке қарағанда, тиiмдiлiгi анағұрлым жоғары болады екен. Қымыз және сиыр сүтiнен жасалатын өнiмдерге қарағанда, шұбаттың құнарлы заттары өте көп. Мәселен, бiр литр түйе сүтiнде 911 ккал болса, бие сүтiнде - 528, сиырдікі - 660 ккалорияны құрайды.
Алдағы уақытта қожалық 460 бас асыл тұқымды ойсыл қараны да көбейтсек деп отыр. Отырар ауданындағы тағы бір кәсіпорын - «Гүлмайра» шаруа қожалығы шұбатты «Отырар Шұбаты» сауда белгісімен шығарып жатыр. Мұнда тәулігіне оған қоса 750 литр қымыран да өндіріледі. Бір айда сүт өнімінің жалпы көлемі 22 тоннаны құрайды.
