АВТОБУС ЖҮРГІЗУШІЛЕРІ КӘСІПОДАҚТАН ЖОЛДАМА АЛДЫ
Шымшаһарда «Шымкент қаласы Кәсіподақтар орталығы» аумақтық кәсіподақтар бірлестігі және «Shymkent BUS» ЖШС-і бастауыш кәсіподақ ұйымының мұрындық болуымен салтанатты шара ұйымдастырылды.
«Shymkent BUS» ЖШС-нде өткен мерекелік кеш Көлік қызметкерлері күні, Конституция күні, компанияның құрылғанына 2 жыл толуына орайластырылды. Онда кәсіподақ мүшелеріне, жүргізушілер мен жұмысшыларға санаторийге жолдамалар, Алғыс хат пен Құрмет грамоталары табысталды.
Марапаттарды "Шымкент қаласы кәсіподақтар орталығы" аумақтық кәсіподақтар бірлестігінің төрағасы Бауыржан Әлтеев және бастауыш кәсіподақ төрайымы Қарлығаш Қолдасбекова, мекеме директоры Азат Қайыпбеков табыстады. Айта кетейік, компания құрылғанына биыл 2 жыл толып отыр. Ал, бастауыш кәсіподақ ұйымы құрылғанына 1,5 жыл толды.
Бауыржан Әлтеев -"Шымкент қаласы кәсіподақтар орталығы" аумақтық кәсіподақтар бірлестігінің төрағасы
Бүгінгі таңда «Shymkent Bus» ЖШС-інде 1000-нан астам жұмысшы жұмыс істейді. Оның 700-і кәсіподақ мүшесі. Солардың бірі Қуаныш Дәулетбаев. Бұл салада еңбек етіп жүргеніне 11 жылдан асыпты. Көпбалалы әке мерекеде мерейі тасығанын айтады.
Қуаныш Дәулетбаев – Шымкент қаласының тұрғыны
Бұл күні Санаторийге жолдамалар 21 жұмыскерге 100 пайыздық жеңілдікпен берілді. Сондай-ақ, 25 жұмыскерге Құрмет грамотасы мен қаржылай сыйақы табысталды. Ата-анасы өмірден озған 4 жұмысшыға, жаңа отбасы құрған 2 азаматқа, 1 мерейтой иесіне 50 мың теңгеден бастауыш кәсіподақ қаржысы есебінен материалдық көмек берілді. Игі шара алдағы уақытта да жалғасын табатын болады.
