Бұрынғы Шымкент әкімінің мүгедек қызы елден жанұшыра көмек сұрауда (фото)

2006 жылы Шымкент қаласының әкімі болған Өмірзақ Әметұлының қызы Әмет Гүлжан Өмірзаққызына шұғыл түрде ем алу қажет. Бұл туралы оның анасы Байділдаева Әлия NUR.KZ порталына хабарлады.

Әлияның айтуынша, қызының шенеунік әкесі науқас перзентіне көмек беруден бас тартқан. Ал баланың жағдайы күннен күнге нашарлап барады, дейді ол.

Былтыр күзде Әлия елді шулатқан мәлімдеме жасап, бірқатар БАҚ беттеріне сұхбат берген болатын. Ол өзін Өмірзақ Әметұлы зорлап, кейіннен "тоқал" болуға мәжбүрлегенін жеткізген. Сонымен бірге, келіншек Әметұлына екі бала туып бергенін және онымен бірге бірнеше жыл бірге тұрғанын айтқан еді.

Әлия Өмірзақ Әметұлының жас қыздан балалары бар екенін естіген оның заңды әйелі өзіне қоқан-лоққы көрсеткенін және балаларын жетімдер үйіне өткізуін талап еткенін мәлімдеген. Ол тіпті осыған қатысты елге видеоүндеу жариялағаны ел есінде. Осы жайтты естіген отандық продюсер Баян Алагөзова қолдау білдіріп, оның мәселесін көтеруге тырысқан еді.

Алайда араға жарты жыл салып, келіншек тағы да елден көмек сұрауға мәжбүр болып отыр. Айтуынша, ол әлі қудалануда, сондықтан бүгінгі таңда Әлия өзі секілді әйелдерге қамқор болып отырған дағдарыс орталықтарының бірінде екенін жеткізді.

"Үлкен қызым Әмет Гүлжан Өмірзаққызына көмектесулеріңізді сұраймын. Оған шұғыл түрде ем алу қажет. Диагнозы - микроцефалия, целебралды сал ауруы, ауыр дәрежедегі спастикалық тетрапарез, сөйлеу және моторикалық қозғалысы тежелген, симпотоматикалық талмасы бар. Гүлжан қазір сегіз жаста. 2013 жылы оны Түркиядағы "Аджибадем" клиникасына апарып емдеткен едік.
Қымбат дәрілер алып, түрлі оңалту процедураларын жасаған соң, оның жағдайы жақсарып, басын тіктеп ұстай алатын болды. Ол кезде күн сайын ем қабылдайтын едік. Алайда соңғы үш жылда өмірімдегі қиындықтарға байланысты оны емдеуге мүмкіндігім болмады. Қызым сағат сайын жылаумен болады. Жағдайы күннен күнге нашарлап барады. Ал ем алу үшін қыруар қаражат керек", - деді Әлия.
Экс-шенеунік болса, әйелі барлық жағдайды біліп қойған соң, Әлия мен одан туған қыздарына көмек беруден мүлдем бас тартқан. Айтуынша, ол 29 мың алимент төлейді екен. Алайда бұл сома баланы емдету тұрмақ, киім-тамағына да толықтай жетпейді екен.

Әлияға қаржылай көмек көрсеткісі келетіндер +7701 817-88-88 нөмеріне хабарасуына болады.

KIWI кошелек: 8 701 817-88-88

Kaspi gold: 5169 4931 2046 6019

Aliya Baidildaeva