"Өзбек, тәжік деп ойлайды. Мен қазақпын". M-1 чемпионы ұлтына қатысты сұраққа нүкте қойды
Жартылай орта салмақта ресейлік M-1 Challenge промоушенінің чемпионы қазақстандық Шавкат Рахмонов KAZMMA Live Channel YouTube-арнасына берген сұхбатында өз өмірі туралы баяндап берді.
"Менің әкем - қазақ. Ұлтым қазақ. Өзбекстанда туғам. Атамның аты Рахман болған. Сондықтан Өзбекстанда тегімді Рахмонов деп жазған. Шавкат арабша есім, Қазақстанда көп танымал емес. Сондықтан үнемі сұрақ қояды, "ұлтың кім?" деген сияқты. Өзбек, не тәжік деп ойлайды. Өзбекстанда туып, өскем. Онда туыстарым да қалды.
Бала кезден ММА-мен шұғылдандым. 2006 жыл болатын. Мектепте оқып жүріп, DVD-дисктерден тамашалайтынмын. Сол кезде чемпион болғым келген. Самбомен айналыстым. Қолым талып қалғанға дейін жаттығатынмын. Кейін самбодан жарыстарға шыға бастадым.
Барлық жекпе-жегімді мерзімінен бұрын аяқтағам. Рингке шығып, өз жұмысымды істеймін. Бірақ толық жекпе-жекке де дайынмын. Айналысатындар біледі. Диванға жабысып алған сарапшылар оны ұқпайды. Бұл қандай еңбек екенін білмейді.
Маңдайың құрғамай еңбектенесің. Ал жалтара бастасаң, көпке бармайсың", - деп атап өтті Рахмонов.
