Адам арам ақша тапқанына намыстану керек, қандай жұмыс істегеніне емес

Бүгін менен бір танысым ақша сұрады, аз емес, бірталай ақша. Қолымда болғанда қомақты қаржыны да беретінімді білетін-ді. 2 баламен үйде отырып, баласының ақшасына күн көргенін, бір жасқа жеткендіктен жәрдемақысы тоқтағанын, күйеуінің жұмысы жүрмей қалып, қыс бойы үйде отырғанын, соған енді бір жаңа іс бастамақ ниетте екендігін жеткізді. «Басқа жұмыс іздеп, қарастырып көрмеді ме?» деген сұрағыма: «Өзінікі жақсы ғой, тек тоқтап тұр», - деді. «Қыс бойы қалай, базарға барып жүк тасыса да нан таппады ма?» дегеніме: «Намыстанады ғой, ондайға түсірмей-ақ қойсын», - дейді. «Саған сұратып отырғанын сезіп тұрмын, жаныңда күбірлеп отыр ғой. Телефонның дыбысын ашшы, естісін, алдымен өзіңе жақсы болады», - дедім. Ашқанын білдіріп: «Сол... сенен бір көмек бола ма деген ғой біздікі...» - деп кідірді. Сонан соң: «Кешірші, бірақ адам арам ақша тапқанына намыстану керек, қандай жұмыс істегеніне емес. Мен өзіме осындай талап қоямын, ол менің жанымда еркек қой. Ол отбасын асырай алмағанына намыстансын! Қыс бойы баласының ақшасына тамақтанғанына намыстансын! Әйелін өзгелерден ақша сұратуға жеткізгеніне намыстансын!» - деп ем, үнсіз қалды. Екеуі де.
Қанша отбасы дәл осы өр намыс пен көр намысты ажырата алмайтындардың кесірінен құрдымға кетті. Азаматтар-ау, тірек дейді сіздерді, намыстарыңызды жоғалтпаңыздаршы, бар байлықтарыңыз сол ғой – біздің арымыз секілді. Ол тапталған күні қоғам азады.
Былтыр көктемде болған жайт. Жазып қойып, жариялауды ұмытып кетіппін. Бірнәрсе ақтарып отырып, алдымнан шықты. Содан есіме түсіп, әлгі азаматпен сөйлестім. Өзім қоңырау соқтым. Алдымен әйелінен нөмірін, көкіректі жиып қойып жұмысқа кіріскенін, қандай тірлік табылады, бәрін білек сыбанып істеп, бір үйдің кірпішін өріп, келесінің жылуын жүргізуге жәрдемдесіп жүргенін естіп алдым. Ал өзінен отбасының жайын сұрадым. Жағдайын сұрадым. Жақсы екен. Баласын бақшаға беріп үлгеріпті, жарын жұмысқа шығарыпты. Өзі толассыз тапсырыстарының арасында әйелі мен ұлын тасудан қолы босамай жүр екен. «Мені мазалауға мұршаңыз болмай жүрсе, керісінше қуанам ғой», - дедім. Ол: «Е, жігітті жылы сөз емес, қатты сөз қайрайды ғой...» - деді.

Айдана Шотбайқызы
Фейсбуктегі парақшасынан